တခါတုန်းက ချာရာဏသီပြည်ကြီးမှာ(အဟဲ...ကာတွန်းဦးဘဂျမ်းစကားလုံးနော်)မင်းတြားကြီး စိတ်ကြိုက် ထုထောင်းလို့ရနေတဲ့ အာဏာလွှတ်ပါတီက ဒုဥက္ကဌကြီး ဦးရွှင်မြူးမှာ မျက်စိဝေဒနာ ခံစားနေရပါသတဲ့...ကလေးတို့ရယ် အဲလေ လူကြီးတို့ရယ်။
ဒီမျက်စိဝေဒနာကို ကုသဖို့အတွက် အိမ်တွင်းချင်းတိုင်းပြည်တခုဖြစ်တဲ့ ပူကာစင်ဆိုတဲ့ တိုင်းပြည် ပိစိညှောက်တောက်လေးတခုဆီကို သွားရတာပေါ့လေ။ အဲဒီပူကာစင်ဆိုတဲ့ တိုင်းပြည်ကလည်း ပိစိညှောက်တောက်လေးသာဆိုတယ် နည်းပညာက အံ့မခန်းတိုးတက်တာ ဆိုတော့ ချာရာဏသီပြည်က မင်းတြားကြီးတောင် သွားသွားပြီး ဆေးကုရပါသတဲ့။
ဒီလိုနဲ့ အာဏာလွှတ်ပါတီက ဒုဥက္ကဌကြီး မျက်စိကုသွားမယ်ဆိုတဲ့ သတင်းကို ချာရာဏီပြည်ကြီးကို ဝေသာလီပြည်လို (ဝေသာလီက အဲဒီခေတ်ကတည်းက ဒီမိုကရေစီစနစ်ဆိုပဲ) ဖြစ်လာရေးအတွက် တွန်းအားပေးနေကြတဲ့ သတင်းဌာနတွေက အပြိုင်အဆိုင် ဖော်ပြ ပြောဆိုကြပါသတဲ့ကွယ်။
အဲ...ဘယ်လောက်တောင် အဲဒီသတင်းကို စိတ်ဝင်စားကြသလဲဆိုတော့ ဒုဥက္ကဌကြီး ပူကာစင်ကို ရောက်ပြီးလို့မှ သိပ်မကြာ နေ့လည်စာလေး သုံးဆောင်နေတုန်းမှာ သတင်းထောက်မတယောက်က ထမင်းဆိုင်ထဲအတင်းဝင်လာပြီး အင်တာဗျူးတော့တာပဲတဲ့။
ဒုဥက္ကဌကြီး မိန်းမကတော့ ဘယ်ကြိုက်လိမ့်မတုန်း။ ဒါပေမယ့်လည်း သူ့မောင်တော်က တိုင်းပြည်ရေးသမားဆိုတော့လည်း နားလည်ခွင့်လွတ်ပေးနေရတာပေါ့လေ။ ဒါနဲ့ အဲဒီသတင်းထောက်မလည်း ဒုဥက္ကဌနဲ့ အင်တာဗျူးရသွားပြီး သတင်းလွှင့်လိုက်တော့ တခြားသတင်းဌာနကြီးတခုကလည်း အဲဒီသတင်းကို သူတို့လည်း လုပ်မယ်ဆိုပြီး တောက်လျှောက်လိုက်တော့တာပေါ့လေ။
နောက်ရက်မှာတော့ အဆက်အသွယ်ရသွားလို့ ဗျူးလိုက်တာ မျက်စိဆေးစစ်တာတောင် ကောင်းကောင်းစစ်ခွင့်မရဘဲ ဒုဥက္ကကြီးမှာ သူတို့ဗျူးတွေ ဖြေပေးနေရတော့သတဲ့ကွယ်။ ဥက္ကဌကြီး မိန်းမကတော့ တော်တော်ကို ဒေါသထွက်နေပြီဆိုပဲ။
ဒါနဲ့ ဆေးခန်းကလည်း ပြန်လာရော ပူကာစင်ရောက် ချာရာဏသီပြည်အရေး တက်ကြွမလှုပ်ရှားနိုင်သူတစုက ဒုဥက္ကဌကြီးတည်းတဲ့ ဇရပ်(အဲဒီခေတ်ကတော့ ဟိုတယ်တွေ မပေါ်သေးဘူးကိုး)ပေါ်ရောက်နေတာကို မိန်းမဖြစ်သူကတွေ့လိုက်ရသတဲ့။
တွေ့လည်းတွေ့လိုက်ရော စရောက်တဲ့နေ့က ထမင်းဆိုင်ထဲအထိ အတင်းဝင်ဗျူးတဲ့ သတင်းထောက်မ အုပ်စုနဲ့ ပြန်လာတယ်မှတ်လို့ "သတင်းထောက်တွေ တော်တော်ကဲ တော်တော်ကဲ"လို့ ရန်ထောင်ပြီး ဒုဥက္ကကြီးကို အတင်းဆွဲခေါ်သွားတော့သတဲ့ကွယ်။
တကယ်က အဲဒီတက်ကြွမလှုပ်ရှားနိုင်သူအုပ်စုက ဒုဥက္ကကြီးကို ကျန်းမာရေးအခြေအနေသွားမေးပြီး လိုအပ်တာတွေ ကူညီနိုင်ဖို့ အားထုတ်ကြတဲ့ အုပ်စုတဲ့ကွယ်။
တက်ကြွမလှုပ်ရှားနိုင်သူ အုပ်စု ပြန်လာတဲ့အချိန်ကြတော့ "တော်တော်အလိုက်ကန်းဆိုးမသိတဲ့ သတင်းထောက်တွေ သူများ ခွဲစိပ်နေတုန်းအထိ ဗျူးချင်နေကြသေးတယ် ၊ သွက်သွက်ဂျိုးပြူးလို မင်းသမီးနဲ့ တိုးပါစေ"လို့ ကျိန်စာတိုက်ခဲ့ကြသတဲ့ကွယ်။
အင်း...တခါတုန်းကပေါ့ကွယ်...တခါတုန်းက။
No comments:
Post a Comment