ယမန်နေ့ မွန်းလွဲပိုင်း (၃) နာရီခွဲခန့်တွင် လှည်းတန်းလမ်းဆုံအနီးရှိ လမ်းသွယ်တခုအတွင်း ဆန္ဒပြပွဲတရပ် ဖြစ်ပွားခဲ့ကြောင်း ကြည့်မြင်တိုင်မြို့နယ်နေသူတဦးက ပြောသည်။
"မနေ့ညနေပိုင်းပေါ့။ အဆောင်တွေရှိတဲ့ လမ်းသွယ်တခုထဲမှာ ဖြစ်သွားတာ။ အဆောင်တွေထဲကနေ မီးရရှိရေး ဒို့အရေး ၊ ရေရရှိရေး ဒို့အရေးအော်ကြရင်း တဖြည်းဖြည်းနဲ့ လူနှစ်ရာလောက် လမ်းပေါ်ထိ ထွက်အော်ခဲ့ကြတယ်လို့ အဲဒီလမ်းထဲက ဖြတ်ပြန်လာတဲ့ သူငယ်ချင်းက ပြန်ပြောတာ။ လမ်းသွယ်နာမည်တော့ မေးမထားလိုက်ရဘူးဗျ"ဟု ၄င်းက ပြောသည်။
ပန်းဘဲတန်းမြို့နယ်အတွင်း နေထိုင်သူတဦးကလည်း အဆိုပါသတင်းကို ကြားမိကြောင်း ၊ ယခုရက်ပိုင်း ရန်ကုန်မြို့တွင်း ရေမီးပြတ်တောက်မှုပိုလာနေကြောင်း ပြောသည်။
၎င်းက "ဒီနေ့တော့ စည်ပင်က ကားတွေနဲ့ရေလိုက်ဝေနေတယ်။ မနေ့က ကိစ္စကြောင့် ချွေးသိပ်တဲ့သဘောနေမှာပေါ့။ လူတွေကတော့ မကျေနပ်ကြတော့ဘူးဗျ။ ဆန်ဈေး ၊ လောင်စာဆီဈေးကလည်း ခုရက်ပိုင်းတက်လာနေပြီ။ မကြာခင်လူထု ပေါက်ထွက်လာတော့မလားပဲ" ဟုဆိုသည်။
ရန်ကုန်မြို့တွင် လုံခြုံရေးလည်း တိုးမြှင့်ချထားကာ ကင်းလှည့်ကားများကို မကြာခဏတွေ့နေရသည့်အပြင် ဆင်ခြေဖုံးမြို့နယ်များတွင် ပေါ်တာဆွဲသည်ဆိုသော သတင်းများ ထွက်ပေါ်နေသောကြောင့် အလုပ်သမားများကို စောစောပေးပြန်နေရကြောင်း ပန်းဘဲတန်းမြို့နယ်ရှိ ပုံနှိပ်တိုက် လုပ်ငန်းရှင်က ဆက်လက်ပြောဆိုသည်။
No comments:
Post a Comment