“ဋ တိုင်ပတ်ခြင်း”

ကိုရင်အေး ဘန်ကောက်ရှိ ကျောင်းတခုသို့ရောက်နေသည်။

ကျောင်းဆို၍ တက္ကသိုလ်မမှတ်လေနှင့်။ ဘုန်းကြီးကျောင်းသို့ ရောက်နေခြင်းဖြစ်၏။

“အား…ကျွတ်..ကျွတ်….ဟုတ်ပြီ…အဲဒီအနာပေါ်သိပ်မလူးနဲ့ဒကာ။ ဘေးက ကွင်းလိမ်း။ ဦးဇင်းစပ်တယ်..ရူး…ကျွတ်…ကျွတ်”

ဘန်ကောက် ၀ပ်တလွန်ကျောင်းတိုက်မှ မြန်မာစာသင်သားသံဃာတပါး ကားတိမ်းမှောက်မှုကြောင့် ပွန်းပဲ့ဒဏ်ရာများ ရလာခဲ့ရာ သတင်းထောက်လေး ကိုရင်အေး လူနာမေးသွားရင်း ဦးဇင်းကို ဆေးလူးပေးနေခြင်းဖြစ်သည်။

ထိုအခိုက် ကျောင်းခန်းအတွင်းသို့ ထိုင်းဆရာတော်ကြီး ကြိမ်တချောင်းနှင့် ၀င်လာသည်။

“ပိုင်…ပိုင်…ဆန္ဒန်းလွန်…ပိုင်…ပိုင်”

ဆရာတော်သည် ကြိမ်လုံးကို ၀င့်ကာဝင့်ကာဖြင့် တပိုင်ပိုင်အော်လေသည်။ ပိုင်ဆိုသည်မှာ ထိုင်းစကားဖြင့် သွားမယ်ဟု ဆိုခြင်းဖြစ်သည်။ မကြာမီရက်ပိုင်းများအတွင်း တပ်ဆင်ထောက်ခံသော အုပ်စုများက ဆန္ဒပြပွဲများ ကျင်းပတော့မည်ဖြစ်ရာ နိုင်ငံရေးအကျပ်အတည်းများကို အေးချမ်းစွာ ဖြေရှင်းနိုင်ရေးနှင့် အရေးအခင်းများအတွင်း သေပျောက်မှုမရှိစေရေးတို့အတွက် ဆရာတော်ဦးဆောင်ကာ ပရိတ်ရွက် ၊ မေတ္တာပို့သွားကြရန် မြန်မာစာသင်သားများ ကျောင်းခန်းတွင်းသို့ ၀င်လာပြီး ဆော်သြနေခြင်းဖြစ်သည်။

သို့နှင့် မြန်မာသံဃာများလည်း သင်္ဏန်းများပြင်ရုံကြရတော့သည်။ သံဃာများအကြား ရောက်နေသောလူဝတ်ကြောင် ကိုရင်အေးကိုလည်း ဆရာတော်မြင်သွားသည်။ မြင်လျှင်မြင်ခြင်း ကိုရင်အေးထံ ကြိမ်လုံးကို ဆန့်တန်းလိုက်ရင်း ကိုရင်အေးကိုပါ တပိုင်ပိုင်နှင့် မြို့ထဲသွားမေတ္တာပို့ရန်အတွက် စီစဉ်ထားသည့် ကားဆီသွားခိုင်းတော့သည်။

ကိုရင်အေးတယောက် ၂၀၀၇ ရွှေဝါရောင်တော်လှန်ရေးနှင့်အတူလိုက်ပါခဲ့ဖူးသည့် ရေစက်က ခုထိ ကုန်ဟန်မတူ။ ဘန်ကောက်ရောက်တော့လည်း သံဃာတော်လှုပ်ရှားမှုများတွင် ကိုရင်အေး သတင်းလိုက်ယူနေရစမြဲ။ ထို့ကြောင့်လည်း ဆရာတော်သည် ကိုရင်အေးကို သတင်းသမားမှန်းသိပြီးဖြစ်၏။ သို့ဖြင့် ကိုရင်အေးကိုပါ ကားဆီ သွားရန် မောင်းထုတ်တော့သည်။ ကိုရင်အေးလည်း ဆရာတော့်ကြိမ်လုံးကြောက်သဖြင့် ကင်မရာမပါ ၊ အသံဖမ်းစက်မပါ ၊ လက်ဗလာဖြင့် ကားပေါ်တက်လိုက်သွားရသည်။

************ ************** ************** *************

“ဒီကနေပြီး ထိုင်းဘုရင်ကြီးတက်နေတဲ့ ဆေးရုံအထိ လမ်းလျှောက်မေတ္တာပို့သွားကြမှာ ဒကာ”

မြန်မာသံဃာတော်တပါး၏ မိန့်ဆိုသံကြောင့် ကိုရင်အေး ခေါင်းပုဝင်သွားသည်။ မပုခံနိုင်ရိုးလား။ ကြည့်ပါဦး။ မြဘုရားရှေ့ရှိ ဆန္ဒလွန်ကွင်းကနေ ကျောက်ဖရားမြစ်တဘက်ကမ်းရှိ ဘုရင့်ဆေးရုံကြီးအထိသွားရမည့် ခြေလျင်ခရီး။
နည်းတဲ့ခရီးမဟုတ်။ အနည်းဆုံး (၅) မိုင်လောက်ရှိမည်။

ပြီးတော့ ကိုရင်အေးက လူနာမေးသွားရမှ ချောဆွဲခံလိုက်ရခြင်းဖြစ်သဖြင့် သတင်းရယူရန်အကူပစ္စည်းဘာမှ မပါ။ ဓါတ်ပုံလေးဘာလေးရိုက်ရင်း ဘေးကလိုက်သွားရတာက ကိစ္စမရှိ။ အလွတ်ကြီး သံဃာများဘေးမှ လျှောက်နေရမည်ကတော့ သိပ်မနိပ်လှ။ ဒီမှာက သံဃာ့ဘေးမှ ကပ်လမ်းလျှောက်သည့် ဒကာဒကာမလည်း မရှိ။ အဲ….သံဃာမေတ္တာပို့သည်ကို ပစ်သတ်မည့် စစ်သားလည်းမရှိ။ သံဃာကို ရေကပ်လှူသည့် စစ်သားနှင့် ရဲတို့ကိုသာ တွေ့ဖူးသည်။ သံဃာ့များနောက်က ကျောင်းဂေါပကအဖွဲ့ဝင်များတော့ လိုက်ပါလေ့ရှိပါသည်။

သိုနှင့် ကိုရင်အေး သံဃာများနှင့် လမ်းလျှောက်မလိုက်တော့ဘဲ ကျောင်းကနေ ဆန္ဒန်းလွန်ကွင်းအထိ လိုက်ပို့သည့် ကားပေါ် ဆရာတော်ကြီးမမြင်အောင် အသာလေးတက်ထိုင်နေလိုက်သည်။ကားပေါ်တွင် ကိုရင်အေး အရင် ရောက်နေသော အဘိုးအဘွားနှစ်ယောက်ရှိနေသည်။ သူတို့သည် ကျောင်းဂေါပကအဖွဲ့ဝင်များဖြစ်၏။ အသက်ကြီးသူများဖြစ်သဖြင့် သူတို့လည်း လမ်းမလျှောက်လိုကြတော့။ လူငယ်ပိုင်း ကျောင်းဂေါပကအဖွဲ့ဝင်လေးဦးလောက်သာ သံဃာများနောက်ပါသွားသည်။

ကားပေါ်ရောက်နှင့်နေသော အဘိုးအဘွားတို့က ၄င်းတို့နည်းတူ အပျင်းထူသော ကိုရင်အေးကို အပြုံးဖြင့် နှုတ်ဆက်ကြသည်။ ကိုရင်အေးလည်း စ၀ါဒီခပ်လိုက်ရသည်။ စ၀ါဒီခပ်ပြီးရင် ငါတော့အေးဆေးကားပေါ်အိပ်နေရုံပဲဟု တွက်ထားသော ကိုရင်အေး တွက်ကိန်းမှားသွားသည်။

ထိုင်းစကားမတတ်ပါဟု ပြောထားသော ကိုရင်အေးကို ထိုင်းအဘိုးအဘွားက အင်္ဂလိပ်လို အင်တာဗျူးလုပ်တော့သည်။ အဘိုးက တက္ကသိုလ်ဆရာအငြိမ်းစားဖြစ်ပြီး ၊ အဘွားက အငြိမ်းစား ကု/လ၀န်ထမ်းတဦးဖြစ်သည်ဟုလည်း ၄င်းတို့ဘာသာ မိတ်ဆက်သည်။

ထို့နောက်တွင်တော့ သတင်းသမားက မမေးရဘဲ အဘိုးအဘွားတို့က တရစပ်မေးနေသဖြင့် ကိုရင်အေးလည်း သူသည် သတင်းသမားတဦးဖြစ်ကြောင်း ၊ သူ့ရုံးသည် ချင်းမိုင်တွင် အခြေစိုက်ကြောင်း ၊ သူဒီကိုရောက်သည်မှာ နှစ်နှစ်ခန့်သာရှိသေးကြောင်း ၊ ဘန်ကောက်တွင် နေရသည်ကို နှစ်သက်ကြောင်း ၊ သတင်းသမားတဦးဖြစ်သဖြင့် အနီအုပ်စုကိုမထောက်ခံသကဲ့သို့ အ၀ါအုပ်စုကိုလည်း အစွဲမထားပါကြောင်း။ ထိုအကြောင်း ၊ အနှီအကြောင်း ၊ ၄င်းအကြောင်း တို့ကို အဘိုးအဘွားနှစ်ယောက်သိလိုသမျှ ဖြေပြရတော့သည်။

မြန်မာအချင်းချင်းမေးခဲ့သမျှ ၀ဋ်ကြွေးကို ဆယ့်ငါးမိနစ်ခန့် ဆပ်လိုက်ရပြီးနောက် မေးခွန်းလေးစဲခိုက် ကားအောက်လစ်တော့အံ့ဟု ကြံရွယ်ကာရှိသေး အဘွားက ကိုရင်အေးလက်ကို ဆွဲကာ ကိုရင်အေးအမည်နှင့် သတင်းဝဘ်ဆိုဒ်ကိုရေးပေးပါဟု ဆိုလာသည်။ ကိုရင်အေး သက်ပြင်းခိုးချရင်း ရေးပေးလိုက်ရသည်။ သို့သော် ထိုမျှနှင့်မပြီး မြန်မာအက္ခရာတွေကို သူမြင်ဖူးချင်ပါသည်။ ရေးပြစမ်းပါဟု တောင်းဆိုလာပြန်လေရာ “ဘဘုန်းတို့ရေ လာကယ်ပါတော့”ဟု ကြုံး၍ မအော်မိအောင် အတော်သတိထားလိုက်ရသည်။

ဒုတိယမ္ပိသက်ပြင်းကို ခိုးချရင်း ကိုရင်အေးတယောက် သူငယ်တန်း မြန်မာစာကို အဘွားထိုးပေးသည့် စာရွက်ပေါ်ချရေးပေးရသည်။

က ၊ ခ ၊ ဂ ၊ ဃ ၊ င
စ ၊ ဆ ၊ ဇ ၊ စ် ၊ ည

အဲဒီ “ည” အပြီးတွင် ကိုရင်အေး ချွေးပြန်တော့သည်။ ထို “ည” မှသည် ရှေ့မတက်နိုင်ဖြစ်နေ၏။ “ဋ” ချိတ်ကို ဘယ်လို ချိတ်ရမှန်းမသိဖြစ်နေသည်။

စဉ်းစား ၊ စဉ်းစား ။ နိုင်ငံခြားသားရှေ့မှာ သိက္ခာအကျမခံနဲ့။ ကိုယ့်ကိုယ်ကို အားပေးရင်း ဦးနှောက်ကို နွေးပေးရသည်။ သကောင့်သား “ဋ” ကို ဘယ်လို ချိတ်ရမလဲ……ဘယ်လိုချိတ်ရမလဲ။

ဦးနှောက်သည် အနွေးခံရဖန် များသဖြင့် ဆန္ဒပြသည့်အနေဖြင့် နဖူးမှ ချွေးတို့ကို ထုတ်လွှတ်သည်။ ထိုင်းအဘွားကြီးကား ကိုရင်အေးထိုင်ရေးပြနေသည်ကို အပေါ်မှ မိုးကြည့်နေသည်။ ပါးစပ်မှလည်း သူတို့ ထိုင်းစာမှာဆိုရင် ကော့ကိုင် ၊ ခေါ်ခိုင်တို့ရှိကြောင်း ၊ ထိုင်းစာသင်ချင်လျှင် လွယ်ကူကြောင်းများကို တရစပ် ပြောပြနေသည်။

“ဋ”ကို ဘယ်လိုချိတ်ရမည်ကို မေ့နေရသည့်အထဲ အဘွားကြီးက ဘေးမှ စကားပေါနေသဖြင့် နဖူးမှ ချွေးတို့ ပိုစို့လာသည်။ တစ်ရှုးထုတ်ပင် တထုတ်ကုန်တော့မည်။ ကိုရင်အေးကား “ည” က မတတ်နိုင်သေး။ “ဋ”ချိတ်တွင် တိုင်ပတ်နေသည်။

နောက်ဆုံးတွင်တော့ မြန်မြန်ပြီး အေးတာပဲဟု သဘောပိုက်ကာ ထိုမစ္စတာ “ဋ”ကို မြန်မာဗျည်း (၃၃) လုံးထဲမှ ကိုရင်အေးသဘောဖြင့် ကိုရင်အေး ပယ်ထုတ်ပစ်လိုက်သည်။

ကျန်ဗျည်းအက္ခရာ (၃၂)လုံးကိုသာ ရေးပြခဲ့ရင်း ကားပေါ်မှ ဆင်းပြေးကာ ဆေးလိပ်သွားဖွာနေလိုက်တော့သည်။

ဆေးလိပ်သောက်ရင်း ကိုရင်အေးဆုတောင်းနေသည်မှာ ထိုအက္ခရာများကို မည်သည့်မြန်မာကိုမျှ အဘွားကြီး မပြမိပါစေနှင့်ဟူ၏။
(တိုင်ပတ်သည်ဆိုသည်မှာ ဘန်းစကားဖြစ်၏။ တိုင်ကိုပတ်၍လှည့်ပါက ခေါင်းမူး ခေါင်းကိုက်သကဲ့သို့ အခက်အခဲများကြုံ၍ ခေါင်းခဲရသည့်အခါ သုံးလေ့ရှိသည့် ဘန်းစကားဖြစ်သည်။)