နေအိမ်အကျယ်ချုပ်ဖြင့် အထိန်းသိမ်းခံနေရသော ဒေါ်အောင်ဆန်းစုကြည်၏ နေအိမ်ခြံဝင်းအတွင်း အမေရိကန်နိုင်ငံသား ၀င်ရောက်ခဲ့မှုကြောင့် နေအိမ်အကျယ်ချုပ်ဖောက်ဖျက်မှုဖြင့် အင်းစိန်ခရိုင်အထူးတရားရုံးက ပြစ်ဒဏ်များချမှတ်ခဲ့မှုအပေါ် ရန်ကုန်တိုင်းတရားရုံးသို့ အယူခံတင်ခဲ့ရာ ယနေ့ တိုင်းတရားရုံးက အယူခံအမှုကို ပယ်ချလိုက်သည်။
“ရန်ကုန်တိုင်းတရားရုံးက အယူခံကိုပယ်လိုက်ပါတယ်။ ကျနော်တို့ တင်ပြလျှောက်လဲခဲ့တဲ့ ၁၉၇၄ အခြေခံဥပဒေဟာ အသက်ဝင်မှုမရှိတော့ဘူးဆိုတာကို တိုင်းတရားရုံးက လက်ခံတယ်လို့ စီရင်ချက်မှာ ဖော်ပြပါတယ်။ သို့သော်လည်း ၁၉၇၅ ခုနှစ် နိုင်ငံတော်အား နှောင့်ယှက်ဖျက်ဆီးလိုသူများဘေးအန္တရာယ်မှ ကာကွယ်တဲ့ ဥပဒေအရ အောက်ရုံးအမိန့်ကို အတည်ပြုတယ်။ အယူခံကိုပယ်တယ်လို့ ဆိုပါတယ်” ဟု ဒေါ်အောင်ဆန်းစုကြည်၏ ရှေ့နေ ဦးဉာဏ်ဝင်းက ပြောသည်။
ဒေါ်အောင်ဆန်းစုကြည်၏ နေအိမ်ခြံဝင်းအတွင်း အမေရိကန်နိုင်ငံသား မစ္စတာယက်တော ၀င်ရောက်ခဲ့မှုအတွက် နအဖစစ်အစိုးရက မေ (၁၈) ရက်တွင် နေအိမ်အကျယ်ချုပ်ဖောက်ဖျက်မှု ပုဒ်မ (၂၂) ဖြင့် အင်းစိန်အထူးတရားရုံး၌ ဒေါ်အောင်ဆန်းစုကြည်ကို တရားစွဲဆိုခဲ့ပြီး သြဂုတ် (၁၁) ရက်တွင် အလုပ်ကြမ်းနှင့်ထောင်ဒဏ် (၃) နှစ် ချမှတ်ခဲ့သည်။ ဒေါ်အောင်ဆန်းစုကြည်နှင့်အတူနေ ဒေါ်ခင်ခင်ဝင်းနှင့် မ၀င်းမမတို့အပေါ်လည်း အလားတူပြစ်ဒဏ်များ ချမှတ်သည်။
ထို့နောက် ဗိုလ်ချုပ်မှူးကြီးသန်းရွှေက နေအိမ်အကျယ်ချုပ် (၁၈) လ ကျခံစေရန်နှင့် မူလတရားရုံးမှ ချမှတ်ခဲ့သော ပြစ်ဒဏ်ကို တ၀က်လျှော့လိုက်ပြီး ကျန်ပြစ်ဒဏ်တ၀က်အား ဆိုင်းငံ့အဖြစ်ထားရှိရန် ပြည်ထဲရေးဝန်ကြီးမှတဆင့် အမိန့်ထုတ်ခဲ့သည်။
ထိုကဲ့သို့ ပြစ်ဒဏ်ချမှတ်ခဲ့ခြင်းအတွက် စက်တင်ဘာ (၃) ရက်တွင် ရန်ကုန်တိုင်းတရားရုံးသို့ အယူခံဝင်ခဲ့ရာ တိုင်းတရားရုံးက စက်တင်ဘာ (၁၈) ရက်တွင် နှစ်ဘက်ရှေ့နေများ၏ လျှောက်လဲချက်ကို ကြားနာခဲ့သည်။
အဆိုပါကြားနာမှုအတွင်း ဒေါ်အောင်ဆန်းစုကြည်၏ ရှေ့နေများက ရန်ကုန်တိုင်းတရားရုံးသို့ ၁၉၇၄ ခုနှစ် အခြေခံဥပဒေ အသက်ဝင်မှုမရှိတော့ကြောင်း သက်သေပြုနိုင်သည့် အထောက်အထား (၄) မျိုးနှင့် အကျယ်တ၀င့်တင်ပြခဲ့ကြသည်။
ယခုကဲ့သို့ တိုင်းတရားရုံးက အယူခံပယ်ချလိုက်သည့်အတွက် ဗဟိုတရားရုံးသို့ ဆက်လက် အယူခံတင်သွင်းသွားမည်ဟု ရှေ့နေဦးဉာဏ်ဝင်းက သတင်းမီဒီယာများသို့ ထုတ်ဖော်ပြောဆိုသည်။
မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ကို နအဖစစ်အစိုးရက နှစ်ပေါင်း (၁၄) နှစ်နီးပါး နေအိမ်အကျယ်ချုပ် ကန့်သတ်ထားခဲ့ပြီး ယခုလည်း ကန့်သတ်ထားဆဲဖြစ်သည်။
No comments:
Post a Comment